ஏதாவதொரு கோவிலில் சொல்லித்தொலைப்போம்!

தமிழக கல்வித்துறையின் புகழ் மகுடத்தில் இன்னுமொரு வண்ண இறகு கூடியிருக்கிறது.

அரசுப்பள்ளிகளில் மாணவர் எண்ணிக்கை வேகமாக குறைந்துவருவது....

தனியார் மெட்ரிகுலேஷன் பள்ளிகளில் மாணவர் எண்ணிக்கை வேகமாக அதிகரித்துவருவது....

கல்வி வியாபாரத்தில் புதுப்புது வியாபாரிகள் நுழைந்து கல்லா கட்டுவது....

தமிழ்க்குழந்தைகள் நாவில் தமிழை அந்நியப்படுத்துவது....

பள்ளிக்கூடம் போகும் ஒட்டகங்களாக தமிழ்க்குழ்ந்தைகளை பொதி சுமக்க வைப்பது....

அரசு விதித்த கல்விக் கட்டணங்களை ஏறிமிதிக்கும் தனியார் பள்ளிகளின் பக்கம் தன்னுடைய குருட்டுப்பார்வையை திருப்புவது....

கட்டணக்கொள்ளையால் பாதிக்கப்படும் பெற்றோர்களின் அவலக்குரலுக்கு தன்னுடைய செவிட்டுக்காதைக்காட்டுவது....

என்று பலவண்ண இறகுகள் இன்றைய கல்வித்துறையின் புகழ் மகுடத்தை அலங்கரிக்கின்றன.

இவை போதாதென்று இப்போது பாடநூல்கள் தட்டுப்பாடு என்றொரு கூக்குரல்.

இது அலட்சியப்படுத்தக்கூடிய குரல் அல்ல.

அபயக்கரம் நீட்டவேண்டிய குரல்.

1 ஆம் வகுப்பிற்கு நான்கு புத்தகங்கள்.
பாடநூல் கழகத்திடம் பள்ளிகள் நேரடியாக வாங்கினால் 200 ரூபாய் விலையாம்.
அங்கீகரிக்கப்பட்ட விற்பனையாளர்களிடம் வாங்கினால் 240 ரூபாயாம்.

6ஆம் வகுப்பிற்கான ஐந்து புத்தகங்களும் பாடநூல் கழகம் 250 ரூபாய்க்கு விற்கும்போது, விற்பனையாளர்கள் மட்டும் 325 ரூபாய்க்கு விற்கும் நிலை.

விலை குறைவாக இருக்கிறதே என்று பாடநூல் கழகத்திற்கு பணம் செலுத்திய பள்ளிகளுக்கு இன்னும் புத்தகங்கள் அனுப்பப்படவில்லை என்று செய்திகள் கூறுகின்றன.

போகட்டும்.....கடையிலாவது வாங்கி பிள்ளைகளை சமாதானப்படுத்தலாமென்றால் புத்தகவிலையேற்றம், விற்பனையாளர் கமிஷன் குறைவு ஆகியகாரணங்களால் 1 ஆம் வகுப்பு 6 ஆம் வகுப்பு புத்தகங்களை விற்பனையாளர்கள் கொள்முதல் செய்வதில் ஆர்வம் காட்டுவதில்லை.

பள்ளிக்கூட பிள்ளைகளின் கவலையைத்தீர்ப்பதில் விற்பனையாளர்களுக்கு ஆர்வமில்லை.

மாணவர்களின் படிப்பு பாழாகிறதே என்று கல்வித்துறைக்கும் கவலையில்லை.

தான் பெற்றெடுத்த பிள்ளை எக்கேடாவது கெட்டுப்போகட்டும் என்று பெற்றவன் விட்டுவிட முடியுமா என்ன?

ஏதாவதொரு கோவிலிலாவது சொல்லித்தொலைப்பானில்லையா