குழந்தை (016)

குழந்தை

சின்ன முல்லை மொட்டு
சிறகு முளையாச் சிட்டு
கன்னம் தங்கத் தட்டு
கரிய புருவம் கட்டு

மின்னல் கண்ணின் வெட்டு
மேனி காஞ்சிப் பட்டு
பின்னும் காலின் எட்டு
பேச்சு தேனின் சொட்டு

துன்ப இருளைத் தொட்டு
துடைத்து எறிந்து விட்டு
இன்பம் விளையும் மட்டு
இசைக்கும் மழலை மெட்டு

அன்னை மனத்தைப் பித்து
ஆக்கப்பிறந்த முத்து
நன்னம்பிக்கை வித்து
நாட்டின் உயர்ந்த சொத்து

நன்றி: சிறுவர்மணி